1119 - Erste urkundliche Erwähnung

Bischof Erlung von Würzburg beurkundet, dass der Freie Gumbert von Equarhofen mit seiner Gattin Christina sich in den geistlichen Stand begeben und seine Güter an einer Anzahl von Orten sowie seine Hörigen ritterlichen und bäuerlichen Standes an das St. Stephanskloster zu Würzburg vergabt habe, bezeugt auch die völlige Freiheit der geschenkten Güter.

Ohne Ortsangabe, 1119.

(Chr.) In nomine sancte et individue trinitatis. Erlvngvs, dei gracia Uvirzeburgensis ecclesię minister humilis. Antecessorum nostrorum sanctissima diligentia iugiter nos ammonet, maxime ecclesiis ac pauperibus Christi pie providere et eorum negocia quasi propria deputando fideliter promovere. Inde est, quod notum esse volumus universitati tam presentium quam subsequentium Christi fidelium, quod libere conditionis vir Gvmbertvs de Ekkeburgehoven cum coniuge sua Christina, quoniam liberos non habuerunt, Christum regem seculorum in celestibus dominum et heredem unanimiter elegerunt, propter cuius amorem mutato seculari habitu coram testibus idoneis liberis ac ministerialibus firmissima sub astipulatione predia sua in presenti karta subternotata, videlicet in his locis sita: Hartpach¹, Lare², V̊renhouen, Gullichesheim, Hotyngen, Rotelse³, Kůbrunnen⁴, Boltheshalden⁵ super reliquias sanctorum apostolorum Petri et Pauli et beati Stephani prothomartyris in suburbio Uvirzeburgensi in usum fratrum ibidem deo servientium delegaverant. Preterea vero sciendum est, quod utriusque sexus homines suos, et milites et ruricolas, similiter cum omni iusticia super easdem predictorum sanctorum reliquias ita sane contradidit, qui milites sunt uti milites ecclesie, quam decenter ac devote inviolabili iure subserviant. Hii scilicet: Burkardus, Emmehardus et Regemboto, Hermannus Glymo^a et uxor eius Regelind^b et eorum filii Adelbertus Walkare^c, Marquuardus. Optentu vero prefati Gumberti^d Hermanno Glymo^e et filiis suis Adelbert et Marqvvardo tantummodo predium, quod est situm Hartpach, dimittitur, ut, quoadusque vivant, absque molestię tributo possideant, sed post obitum eorum abbati et fratribus suis precise et absque omni tergiversatione in omnem usum^f et potestatem redeat. Item Fridehalmus, Dyemo milites^g, famuli Růkkerus, Adelman eiusque filii Erkenbertus, Cůno et Adelbertus frater eius, Berhta cum filiis suis, Hiltegunt et filii eius, Mehtild cum filiis suis Adelberone et Wigando, hii quoque viri in omni sua posteritate circa ętatem censualem V denarios annuatim ecclesie persolvant, sed si quos ex eis abbas in aliquod sibi servitium subdere voluerit, potestatem plenissimam habebit. Feminę vero tres denarios etate solita exsolvant. Hęc igitur donatio nostra auctoritate mediante peracta et huius sigilli nostri impressione confirmata, si quis in posterum annullare temptaverit, auctoritate nostra et beati Petri et tocius sancte ecclesie ęterno anathemati perpetuo igne cruciandus subiacebit. Sub huius etiam sigilli nostri testimonio in verbo domini testificamur, omne prescriptum predium a libere conditionis viro Gumberto et coniuge sua Christina mutato ibidem seculari habitu super reliquias prefatorum sanctorum pro remedio animarum suarum reverenter traditum ab omni advocato et exactione liberum esse et in solius abbatis et fratrum suorum manu et potestate permanere debere nec aliqua venditione aut abrasione ab ecclesia umquam alienari licere.

Acta anno domini MCXVIIII^o., indictione XII^a., domino Heinricho dei gratia quinto Romanorum imperatore feliciter imperante, venerabili Uvirzeburgensium Erlvngo dei gratia episcopo, domino Ezzone omni religione et sanctitate presidente abbate, Goteboldo urbis prefecto. Testes: Cůnimunt, Erkenberto, Cůnrad, Bernger, Volknand, Růdolf, Swiker, Heinrich, Eberwin, Hiltebrant, Helmbolt, Alexander, Ekehardus, Herolt, Bernolt, Riutwig, Gotefrid, Reginhardus, Wolfframmus, Bern, Burkardus^h, Adelricus, Richalmus, Ebbo, Rudegerus, Heinricus, Rudolfus, V̊dalricvs, Ingram, Werherus, Goteboldus, Merboto, Rudolfus, Hartmannus aliique plures.